Dan il-kors għandu l-għan li jistudja u jesplora r-Romantiċiżmu fil-letteratura Maltija, kemm fin-narrattiva kif ukoll fil-poeżija. Fid-diversi xogħlijiet letterarji li nkitbu f’dan il-perjodu se nixtarru l-prinċipji ewlenin tar-Romantiċiżmu. Ninnotaw kif l-awturi u l-poeti Maltin ħaddnu dawn il-prinċipji u pproduċew letteratura Romantika li ssegwi dik Ewropea. Naraw kif dawn il-kittieba użaw il-letteratura bħala arma, biex tqajjem kuxjenza fost il-poplu. Ix-xogħlijiet letterarji Romantiċi baqgħu jinkitbu sa ftit iktar min-nofs is-seklu 20. Permezz ta’ xogħlijiet letterarji li nkitbu matul il-medda ta’ snin li fihom ir-Romantiċiżmu kien in-nifs tal-lettaratura Maltija, se niddiskutu u nanalizzaw l-elementi u l-karatteristiċi li jagħmlu dawn ix-xogħlijiet Romantiċi, il-patrijottiżmu, in-nostalġija, ir-reliġjon, l-għożża tan-natura, l-immaġinattiv u l-fantastiku, u s-sentiment. F’dawn il-lekċers se naraw kif il-letteratura Romantika għolliet id-dinjità u l-importanza tal-lingwa Maltija. Il-letteratura Maltija bdiet tinkiteb kollha bil-Malti, fi żmien meta l-Malti sar l-ilsien Nazzjonali u uffiċċjali. Ninnotaw u naraw kif il-letteratura Romantika tippreżentalna ritratt perfett tal-qagħda soċjali tal-poplu Malti, bit-tbatijiet u d-diffikultajiet li kienu jgħixu fihom. Niddiskutu din il-qagħda u l-effett tagħha fuq is-soċjetà u l-iskop tal-kittieba li jqanqlu kuxjenza Nazzjonali u dinjituża fil-poplu.Fil-poeżija nanalizzaw il-prosodija u l-metrika tal-poeżija Romantika kif ukoll l-użu tal-lingwa. Naraw ukoll x’kienu t-temi l-iktar diskussi f’dawn il-poeżiji u x’kien l-iskop tal-poeti u l-messaġġ ewlieni li riedu jwasslu lill-poplu f’dan il-perjodu diffiċli. 

By the end of this programme, participants should be able to: